ລາວ-ໄທປຶກສາຫາລືແລກປ່ຽນບົດຮຽນໃນການຄຸ້ມຄອງ, ພັດທະນາ ແລະ ສົ່ງເສີມການນຳໃຊ້ ICT



ທ່ານ ປອ ທັນສະໄໝ ກົມມະສິດ, ລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ແຫ່ງ ສປປລາວ ໄດ້ໃຫ້ກຽດຕ້ອນຮັບ ທ່ານ ປອ ພິເຊດ ດຸລົງຄາເວໂລດ ລັດຖະມົນຕີ ກະຊວງ ດີຈີຕອນ ເພື່ອເສດຖະກິດ ແລະ ສັງຄົມ (MDES) ຣາຊະອານະຈັກໄທ ພ້ອມດ້ວຍຄະນະ ໃນການປະຊຸມພົບປະສອງຝ່າຍ ວຽກງານ ເຕັກໂນໂລຊີການສື່ສານຂໍ້ມູນຂ່າວສານ (ICT) ໃນວັນທີ 2 ກຸມພາ 2018.

ໃນການມາຢ້ຽມຢາມຄັ້ງນີ້, ທັງສອງຝ່າຍໄດ້ປະຊຸມປຶກສາຫາລືແລກປ່ຽນບົດຮຽນໃນການຄຸ້ມຄອງ, ພັດທະນາ ແລະ ສົ່ງເສີມການນຳໃຊ້ ICT, ພ້ອມນັ້ນ ກໍ່ໄດ້ຮ່ວມລົງນາມ ໃນບົດບັນທຶກຄວາມເຂົ້າໃຈ ໃນການຮ່ວມມື ແລະ ແລກປ່ຽນບົດຮຽນ ໃນຫຼາຍດ້ານ ເຊັ່ນ: ວຽກງານ ໄປສະນີ, ໂທລະຄົມມະນາຄົມ, ນະໂຍບາຍດ້ານເຕັກໂນໂລຊີ ດີຈີຕອນ ແລະ ໄອຊີທີ, ການຄຸ້ມຄອງລັດດ້ວຍດີຈີຕອນ(Digital Government), ການປ້ອງກັນໄພພິບັດທາງຄອມພິວເຕີ(Cybersecurity), ການສົ່ງເສີມ ແລະ ພັດທະນາອຸດສາຫະກຳດີຈີຕອນ ແລະ ໄອຊີທີ, ການພັດທະນາການບໍລິການແລະພື້ນຖານໂຄ່ງລາງ, ວຽກງານນະວັດຕະກໍາໄອຊີທີ ແລະ Startup.

ທ່ານ ປອ ທັນສະໄຫມ ກົມມະສິດ, ລັດຖະມົນຕີ ກະຊວງ ປທສ ໄດ້ຕີລາຄາສູງ ຕໍ່ການມາຢ້ຽມຢາມ ຂອງ ທ່ານ ປອ ພິເຊດ ດຸລົງຄາເວໂລດ ລັດຖະມົນຕີ ກະຊວງ ດີຈີຕອນ ເພື່ອເສດຖະກິດ ແລະ ສັງຄົມ (MDES) ລາຊາອານາຈັກໄທ. ເຊິ່ງການຢ້ຽມຢາມຄັ້ງນີ້ ເປັນນິມິດໝາຍອັນໃໝ່ ໃນການຮ່ວມມື ແລະ ແລກປ່ຽນບົດຮຽນ ດ້ານໄປສະນີ, ໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ ລະຫວ່າງ ສອງກະຊວງ ໃຫ້ມີຄວາມຕໍ່ເນືອງ ແລະ ເພີ້ມທະວີຂື້ນໃນທຸກລະດັບ. ທັງໝົດນີ້ ຈະກາຍເປັນບາດກ້າວໜຶື່ງທີ່ເປັນພື້ນຖານໃຫ້ແກ່ການຮ່ວມມື ທາງດ້ານການຄຸ້ມຄອງ ວຽກງານໄປສະນີ, ໂທລະຄົມມະນາຄົມແລະ ການສື່ສານ ກໍ່ຄື ເຕັກໂນໂລຊີການສື່ສານຂໍ້ມູນຂ່າວສານ ລະຫວ່າງ ສອງປະເທດ ເພື່ອຮອງຮັບໃຫ້ແກ່ ການເຊື່ອມໂຍງກັບ ບັນດາປະເທດອາຊຽນ ທັງເປັນການຕອບສະໜອງ ໃຫ້ແກ່ການຈັດຕັ້ງປະຕິບັດ ແລະ ບັນລຸເຖິງ ເປົ້າໝາຍຍຸດທະສາດ ການພັດທະນາ ທາງດ້ານໂທລະຄົມມະນາຄົມ ແລະ ໄອຊີທີ ໃນຂົງເຂດອາຊຽນ.

ສໍາລັບ ສປປ ລາວ ການພັດທະນາ ວຽກງານ ໄປສະນີ, ໂທລະຄົມມະນາຄົມແລະ ການສື່ສານ ກໍ່ຄື ເຕັກໂນໂລຊີການສື່ສານຂໍ້ມູນຂ່າວສານ ຍັງປະເຊີນກັບ ສິ່ງທ້າທາຍ ຫຼາຍດ້ານ ແລະ ມີຄວາມຈໍາເປັນ ຕ້ອງມີການ ແລກປ່ຽນບົດຮຽນ ແລະ ປະສົບການກັບ ບັນດາປະເທດ ທັງພາກພື້ນ ແລະ ສາກົນ ເພື່ອນຳມາດັດປັບ ໝູນໃຊ້ເຂົ້າໃນການ ພັດທະນາວຽກງານໂທລະຄົມມະນາຄົມ ແລະ ICT ໃຫ້ມີປະສິດທິຜົນ ແນ່ໃສ່ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ຫຼາຍຂຶື້ນກວ່າເກົົ່າ, ທັງສ້າງເງື່ອນໄຂ ໃຫ້ ສປປ ລາວ ສາມາດເຊື່ອມໂຍງ ກັບພາກພື້ນ ແລະ ສາກົນ ແລະ ກຽມພ້ອມຫັນເປັນເສດຖະກິດດີຈີຕອນ.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   4
ມື້ວານນີ້   38
ອາທິດນີ້   2428
ອາທິດແລ້ວນີ້   1953
ເດືອນນີ້   8774
ເດືອນແລ້ວນີ້   9197
ທັງຫມົດ   51242

ຕິດຕໍ່ພວກເຮົາ

>