ກອງປະຊຸມລັດຖະມົນຕີ ICT 2016



ໃນລະຫວ່າງວັນທີ 30-31 ພຶດສະພາ 2016 ທີ່ຜ່ານມານີ້ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໄດ້ເຂົ້າຮ່ວມກອງປະຊຸມສໍາມະນາ ICT ລະດັບລັດຖະມົນຕີ (the Ministerial Forum on ICT 2016), ທີ່ຈັດຂຶ້ນທີ່ປະເທດ ສິງກະໂປ ໂດຍ ອົງການດັດສົມໂທລະຄົມສິງກະໂປ, ມີທ່ານ ດຣ yaacob Ibrahim ຮອງລັດຖະມົນຕີກະຊວງ ຂໍ້ມູນຂ່າວສານ ແລະ ການສື່ສານ ເປັນປະທານ, ໂດຍການເຂົ້າຮ່ວມຂອງ ທ່ານ Kevin Martin, ຮອງປະທານ Mobile and Global Access Policy of Facebook ແລະ ຄະນະຜູ້ແທນຈາກປະເທດຕ່າງໆ ພ້ອມດ້ວຍແຂກຈາກພາກສ່ວນອຸດສາຫະກໍາທີ່ຖືກເຊີນ ພາຍໃຕ້ຄໍາຂວັນ “ການເຊື່ອມຕໍ່, ເນື້ອໃນ ແລະ ຄວາມປອດໄພທາງອິນເຕີເນັດ”, ຊຶ່ງຫົວຂໍ້ດັ່ງກ່າວ ແມ່ນປະເດັນທີ່ແຕ່ລະປະເທດໃຫ້ຄວາມສົນໃຈໃນປະຈຸບັນ ຕໍ່ກັບການພັດທະນາ ICT ທີ່ກ້າວກະໂດດຂັ້ນ.

ກອງປະຊຸມຄັ້ງນີ້ໄດ້ປຶກສາຫາລືກ່ຽວກັບຫົວຂໍ້ທີ່ສໍາຄັນຄື: ຄວາມທ້າທາຍ ແລະ ກາລະໂອກາດທີ່ເກີດຈາກ ນະວັດຕະກໍາໃໝ່ ແລະ ການເຊື່ອມຕໍ່, ການເພີ່ມຂຶ້ນຂອງຜູ້ສະໜອງການບໍລິການ Over The Top (OTT), ຫຼັກການຄວາມເປັນກາງທາງອິນເຕີເນັດ (Net Neutrality) ແລະ ການບໍລິການທີ່ບໍ່ເສັຍຄ່າໃຊ້ຈ່າຍເພີ່ມເຕີມ (Zero-rating content and services) ທີ່ເປັນຈຸດເດັ່ນໃນກອງປະຊຸມຄັ້ງນີ້ກໍຄື: ຄະນະຜູ້ແທນຈາກແຕ່ລະປະເທດ ຈະໄດ້ເຂົ້າຮ່ວມການຈຳລອງເຫດການດ້ານຄວາມປອດໄພ ທາງຄອມພິວເຕີ, ຊຶ່ງບັນດາຜູ້ແທນຈະໄດ້ປະສົບກັບບັນດາເຫດການ ທີ່ເປັນອັນຕະລາຍທາງໂລກອອນລາຍ ຊື່ງການຈໍາລອງເຫດການ ຈະເປັນເຫດການຕໍ່ເນື່ອງ ແລະ ຂຶ້ນກັບວິທີການໃນການຕັດສິນໃຈຂອງຄະນະຜູ້ແທນ. ກອງປະຊຸມລັດຖະມົນຕີ ຄັ້ງນີ້ຈະເປັນຄັ້ງທຳ ອິດທີ່ມີການຈັດການຈຳລອງເຫດການ ທາງດ້ານຄວາມປອດໄພຂອງລະບົບອອນລາຍ. ການຈຳລອງດັ່ງກ່າວຈະເຮັດໃຫ້ຄະນະຜູ້ແທນ ທີ່ເຂົ້າຮ່ວມໄດ້ເຫັນເຖິງພາບລວມ ຂອງເຫດການທີ່ກ່ຽວຂ້ອງ ເພື່ອເພີ່ມທະວີຄວາມຮັບຮູ້, ບັນຫາຄວາມປອດໄພທາງລະບົບອອນລາຍ ທີ່ເກີດຂຶ້ນໃນປັດຈຸບັນ. ການປະກອບສ່ວນຢ່າງຕັ້ງໜ້າຂອງຄະນະຜູ້ແທນ ແລະ ເຈົ້າໜ້າທີ່ອາວຸໂສ ແມ່ນມີຄວາມຈໍາເປັນເພື່ອເປັນການ ເກັບກ່ຽວປະສົບການໂດຍກົງເຖິງການຕັດສິນໃຈຂອງຄະນະນຳ ທີ່ຈະສາມາດປ່ຽນແປງ, ບໍລິຫານ ແລະ ການກຽມພ້ອມຈັດການ ກັບບັນຫາທີ່ຈະເກີດຂຶ້ນນັ້ນ.

ໃນໂອກາດນີ້, ທ່ານ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ຮັບກຽດຂຶ້ນປະກອບຄໍາເຫັນຕໍ່ກອງປະຊຸມກ່ຽວກັບບົດບາດ ICT ທີ່ສໍາຄັນໃນການສະໜັບສະໜຸນ ການເຊື່ອມໂຍງ ແລະ ການເຊື່ອມ ຕໍ່ລະດັບພາກພື້ນ ແລະ ສາກົນ. ນອກນັ້ນຍັງເປັນຕົວຂັບເຄື່ອນການເຊື່ອມໂຍງເສດຖະກິດ ແລະ ການພັດທະນາຊຸມຊົນໃນຂົງເຂດ ພາກພື້ນ, ສໍາລັບບັນດາປະເທດທີ່ກໍາລັງພັດທະນາ ພາລະບົດບາດຂອງຜູ່ວາງນະໂຍບາຍ ແມ່ນຮັບປະກັນວ່າໃຫ້ທຸກຄົນສາມາດເຂົ້າເຖິງ ແລະ ນໍາໃຊ້ ICT ເພຶ່ອຫຼຸດຜ່ອນຄວາມແຕກໂຕນໃນການນໍາໃຊ້ດິຈິຕອນ (Digital Divide). ໃຫ້ສັງຄົມມີການເຊື່ອມຕໍ່ ແລະ ເຊື່ມໂຍງກັນຜ່ານ ICT ຫຼາຍຂຶ້ນ, ມີຫຼາຍການລິເລິ່ມ ເປັນຕົ້ນ ການວາງແຜນນະໂຍບາຍ ICT ແຫ່ງຊາດ ໂດຍເປົ້າໝາຍແມ່ນແນ່ໃສ່ ໃຫ້ມີິອິນເຕີເນັດຄວາມໄວສູງ ແລະ ຄວາມສາມາດໃນການເຂົ້າເຖິງອິນເຕີເນັດໄດ້ທຸກບ່ອນທຸກເວລາ. ໃນເວລາດຽວກັນ ມະຫາພາກໄດ້ ມີການຄຸ້ມຄອງອິນເຕີເນັດ ເພື່ອຮັບປະກັນບັນດາຄວາມປອດໄພ, ການປົກປ້ອງຂໍ້ມູນ, ແລະ ອື່ນໆ. ບັນຫາຕ່າງໆທີ່ເກີດຂຶ້ນ ທາງໂລກອອນລາຍເຮັດໃຫ້ຈໍາເປັນຕ້ອງດັດສົມ ແລະ ວາງລະບຽບການໃຫ້ເຂັ້ມງວດ.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   25
ມື້ວານນີ້   73
ອາທິດນີ້   561
ອາທິດແລ້ວນີ້   773
ເດືອນນີ້   2389
ເດືອນແລ້ວນີ້   2572
ທັງຫມົດ   47665

ຕິດຕໍ່ພວກເຮົາ

>